Málsøkið Vitaverk og sjóuppmerking er nú komið á føroyskar hendur, og hetta varð markerað við hátíðarhaldi á Sjóvinnustýrinum á Giljanesi í dag, 3. juni 2024.
Samstundis varð samstarvsavtala undirskrivað við danska Søfartsstyrelsen, sum higartil hevur umsitið økið, sum setir karmarnar um samstarvið millum Sjóvinnustýrið og Søfartsstyrelsen framyvir.
Høgni Hoydal, landsstýrismaður í uttanríkis- og vinnumálum, flutti fram røðu. Eisini søgdu Andreas Norseth, stjóri í danska Søfartsstyrelsen og Hans Johannes á Brúgv, stjóri í Sjóvinnustýrinum, nøkur orð.
Sjóvinnustýrið hevur stovnað nýggja deild – Vitaverk og sjóuppmerking – har Asbjørn Østerø er deildarleiðari. Afturat honum er Georg Jacobsen, sum er teknikari. Eisini verða 10 vitapassarar knýttir at Sjóvinnustýrinum sum tímalønt starvsfólk. Sjóvinnustýrið hevur yvirtikið øll hesi starvsfólk frá Søfartsstyrelsen.
“Vit gleða okkum at fara í gongd við hetta nýggja arbeiðsøkið og lova at røkja tað væl”, segði Hans Johannes á Brúgv m.a. í røðu síni.
Her eru nakrar myndir frá móttøkuni.
Andreas Norseth og Hans Johannes á Brúgv
Samstarvsavtalan verður undirskrivað
Høgni Hoydal, Landsstýrismaður
